Nieje Opsjtaeker óntworpe door Fons Schobbers

De Venlose kunstenaer Fons Schobbers haet de nieje Opsjtaeker ontworpe. Hij druëg de vastelaovessjpeld op aan alle liedjessjriévers in de gemeinte Venlo.

“Muziek is de drager van de vastelaovend, ‘t verbingk ós. Wat is ‘t heerlik öm in de veurjaorszón vur ‘n kefee met bekinde en ónbekinde same dees liedjes te zinge”, zaet Schobbers, dae zich bezónger verierd veult door ‘t verzeuk öm de Opsjtaeker 2018-2019 te óntwerpe.

Volges de kunstenaer óngerscheidt vastelaovend zich met name door de liedjeskultuur van angere fiëste. “Jónk en aad zingk allemaol same en de liedjes waere van generasie op generasie doorgegaeve, sjoën is det!”, meint Schobbers, dae zelf lid waas van de ‘Oëit Haos Prinse’ en wal 35 kier in de optoch haet meigeloupe, dök as ‘faatse’ of met ‘n klein gruupke.

Schobbers woort names alle sjtadsdeilvereiniginge door veurzitter Roel Versleijen van Jocus gevraog öm de nieje Opsjtaeker te óntwerpe. Met dees sjpeld gaeve de dragers bliek van eur betrokkeheid beej de vastelaovend en waardering vur al die vreejwilligers die vastelaovesaktiviteite organisere in de versjillende sjtadsdeile. De verkoupopbrings is ‘nne finansjele opsjtaeker vur alle vastelaovesvereiniginge in de gemeinte. Jocus (Venlo), de Wortelepin ( Bliërick), D’n Oeles (Tegele), de Belhamels (Belvend) en de Keieschiëters (Arce) haope det inwoëners ‘t sjpeldje ouch dit jaor massaal gaon koupe öm zoé eur aktiviteite te óngersjteune. De nieje Opsjtaeker wuúrt tradisjoneel op de ‘elfde van de elfde’ geprizzenteerd en is vanaaf dae daag ouch verkriegbaar beej de Beerpiëp en tiédes de verschillende vastelaovesaktiviteite van de Beerpiëp.