Primeur op jaorvergadering Beerpiëp

Op de jaorlikse algemeine leejevergadering van vastelaovesgezelsjap De Beerpiëp woort op 24 oktoëber historie gesjreve. Niels van Rijt zörgde vur ‘nne ónvervalste primeur door as ierste vanoét de Beerpiëpjeug door te sjtruime nao ‘t besjteur van de vereiniging. Niels (29) sjting in 2011 aan de weeg van de mei op zien inisjatief opgerichte jeugaafdeiling en makde in 2015 de euversjtap nao de groëte Raod van 11. Hae nimp de vacante besjteurszetel euver van Tim Offermans, dae ierder al tössetiéds waas gesjtop.

Veuroétloupend op de protocollaire wisseling van de wach droog aaftraejend Vors Cambrinus VI Bart Schouwenberg zien plaats in ‘t besjteur al euver aan ziene opvolger Stevie Haazen. De offisjele euverdrach van ‘t vorssjap is op 17 november tiedes de interne äöpening van ‘t nieje vastelaovessezoen.

Daonaevebeej zien penningmeister Frank Wijnands en besjteurslid Erwin Vesseur herkaoze vur ein periode van dreej jaor.

De Beerpiëp geit zich now opmake vur d’n elfde van d’n elfde. Dae daag wuúrt tradisjoneel bekind gemak aan wae de Pannekletser is toegekind. De oétreiking van dees hoëge óngersjeiing vingk plaats op 2 fibberwari 2019. Op ‘t aansjloétende Cambrinusbal zal ‘t nieje Beerpiëp Trio zich prizzentere. Daags daonao volg de bekindmaking van ‘t jeugtrio.