Pannekletser vur Sjaak Smetsers

De Pannekletser, de hoëgste óngersjei-ing van vastelaovesgezelsjap De Beerpiëp oét Tegele, is dit jaor toegekind aan Sjaak Smetsers. Det is vandaag, tradisjoneel op de ‘elfde van de elfde’, bekind gemak. De oétreiking zal op zaoterdig 2 februari plaatsvinge in kultureel centrum De Haandert in Tegele.

Sjaak Smetsers (63) wuúrt gehöldig vanwaege ziene inzet vur de Tegelse kultuur en het behaad daovan. De in Venlo gebaore kunstenaer, dae ‘n eige galerie aan de Groëtesjtraot haet, is veurzitter van de sjtichting Tegula Cultura en mei-oprichter en aad-besjteurslid van Tegele.NL, initiator en organisator van het fiësjaor 2017 woë-in gevierd woord det Tegele 200 jaar bij Nederland huúrde. Daonaevebeej is hae ónger mier aktief gewaes vur botanische tuin De Jochumhof en ‘t kultuurhistorisch jaorbook De Buun. Ouch zet Smetsers zich met regelmaot in vur gójje doele, zoe-wie Unicef, War Child en het Toën Hermans Hoés.