Beerpiëpjeug in bewaeging

Zaoterdaag 16 november waas de interne äöpening van ’t nieje vastelaovesseizoen beej v.g. De Beerpiëp. Ouch de jeug waas heej (bijna) compleet beej aanwezig inclusief ’t jeugtrio van 2019, prins Luc I (Beurskens) en zien adjudante Juul (Probst) en Luuk (van Rhee). As herinnering aan eur periode woorte zeej óngersjeije mèt de Beerpiëpjeug herinnerings pin. Luc I kreeg de goude aad-prinse pin en Juul en Luc de zilvere aad-adjudante pin. De letste twieë hebbe besjlaote toe te traeje beej de Beerpiëpjeug en waere, ömdet ze nów nag in functie ware, geïnsjtalleerd tiedes ’t intern veursjtelle van ’t jeugtrio 2020. Prins Luc sjluut zich wir aan beej Oeles Toekoms en woort van herte bedank vur de sjoeënen tied in ’t aafgeloupe seizoen.

’t Baovesjtaonde waas neet ’t enige det d’r beej de jeug gebeurde. D’r is aafsjied genaome van inkele jeugraodsleje die d’n euversjtap hebbe gemak naor de ‘groeëte’raod, det ware Jelco Schreurs, Dion Geraads en Rogér de Boer, ouch eur woort vuuel succes gewins. Dit vertrek woort waal wir direk good gemak en aangevult mèt nieje jeugleje die geïnsjtalleert woorte, det zien Jordy Thissen (broor van aad-prins en raodslid Lars) en Stan Teeuwen (zoon van aad jeucie veurzitter Marcel en broor van raodslid Lars (dae ángere..) ). Zeej zien nów mèt ’t jeugspeldje compleet en in vol ornaat.
 
vorswisseljeug
 
Den haet d’r nag eine wisseling van de wach plaatsgevónge in de ceremoniele functies. Jeugvors Frank Trossel had de laeftied bereik öm ouch d’n euversjtap te make, aevel haet hae besjlaote öm d’r gans mèt te sjtoppe. Maar hae meus wie den ouch nao jaore zien vaere en vorsteketting euverdrage. Det deej hae, inmiddels door de wol geverf, mèt ein sjoeën wäördje aan ziene opvolger Vince Coolen. Deze noom dit in dank aan en had ouch metein ziene ‘maiden’ speech klaor. Met get leuke anekdotes bedankde hae Frank vur wat dae vur de jeug haet beteikent. Hae sjtelde zich, ouch ónger belangsjtelling van femielie, veur op ’n wies die op de de ein of angere meneer herinneringe opreep aan eine aad-Vors Cambrinus dae ein veurbeeld waas en is vur zien opvolgers en de jeugvorse.
 
vorsjeugfamilie
  sirremoniewisseljeug
Vors Vince kós al metein aantraeje beej nag ein functiewisseling. Jeug-sirremoniemeister, de al ierder geneumde Rogér de Boer, ging letterlijk ziene sirremoniemeister sjtek euverdrage. Dit deej hae aan, inmiddels alwir bijna ‘aje’ garde ouch al ken hae nag lang mei, aad-adjudant en raodslid Jordy Kempen. Same mèt Vince en chef du protocol Sem, zal Jordy de jeugraod en ’t trio 2020, maar haopelik ouch nag vuuel daornao, veurgaon tiedes ’t seizoen.
Zoeeë zeet ge ouch de jeug van v.g. De Beerpiëp blief in bewaeging.
 
Franc van Baar